Muqdisho,(insideomalia.org) - Kooxo bastoolado ku hubeysan ayaa saakay toogasho ku dhaawacay mas'uul ka tirsan maamulka Degmada Xamarweyne ee Gobolka Banaadir iyadoo kooxaha falkaas geystayna ay baxsadeen.

Mas'uulka la dhaawacay oo lagu Magacaabo Maxamed Cabdi Ducaale ayaa waxay kooxuhu ku dhaawaceen Degmada Xamarweyne, waxaana uu ahaa Guddoomiyaha xaafada Hilaac ee Degmadaasi.

Dhaawaca sarkaalkaan ka tirsan Maamulka Gobolka Banaadir ayaa loo qaaday Isbitaal, iyadoo goobta uu falkaas ka dhacay ay gaareen Ciidamo Booliis ah, balse aan cidna u qaban falka.

Sidoo kale kooxo hubeysan ayaa xalay ku dilay gurigiisa Cabdi Mire oo lagu sheegay inuu ahaa ruux ka ganacsada Mukhaadaraadka, waxaana lagu weeraray gurigiisa bamka gacanta laga tuuro.

Guriga ruuxaan la dilay oo ku yaala xaafada Waaberi ayay sheegeen dadka Degmadaas in ay weerareen shan qof oo ku hubeysanaa Bambooyin iyo Bastoolado, kuwaasoo rasaas toos ah la beegsaday Marxuumkan geeriyoodey.